அரசாள 56" மார்பளவு வேண்டுமா ?

அரசியல் தலைவர்கள் தங்கள் பிரச்சாரத்தில் 56 இன்ச் மார்பளவைப் பற்றிப் பேசியதைக் கவனித்திருப்போம்.

56 இன்ச் மார்பளவு என்பது டெய்லர் எடுக்கும் சட்டை அளவுக்காகச் சொல்லப்படுவதல்ல. 

அது வலிமையான தலைமைப் பண்பிற்கும் தன்னம்பிக்கைக்கும் கூறப்படும் ஒரு குறியீடு. 

Metaphorical expression போல அதைச் சொல்லலாம். 

ஒரு நாட்டின் தலைவன் என்றால் ஓய்வும் உறக்கமும் இல்லாமல் சோர்வாக  இருந்தாலும் ஓயாது உழைக்க வேண்டும்.  

ஒவ்வொரு நாளும் ஒவ்வொரு விஷயத்திலும் நூற்றுக்கணக்கான ஆலோசனைகள் வரும்.  

அதில் முடிவெடுக்கும் திறன், வருமுன் அறிதல், விளைவுகளை எதிர்கொள்ளுதல், கடினமான நேரங்களில் தன்னிலை பிறழாமல் துவண்டு போகாமல் பிரச்னைகளை எதிர்கொள்ளும் சாதுரியம் என எல்லாவற்றுக்குமான குறியீடு அது.

56 இன்ச் மார்பளவு என்பது என்னவோ உடல் அளவைச் சொல்வதாக நினைத்துக் கொண்டு குழம்பிக் கொள்பவர்களும் உண்டு.

கம்ப இராமாயணம் கூட இந்த மார்பளவைப் பற்றிக் கூறுகிறது.

காதோரம் வெள்ளை முடி வந்தவுடன் தசரதன் தனக்கு முதுமை வந்துவிட்டது என்று கருதுகிறான்.

தான் இத்தனை ஆண்டுகளாகச் சுமந்த அந்த அரச பாரத்தைத் தாங்க வேண்டும் என்றால் அதற்கேற்ப ராமன் வலிமை பெற்றிருக்க வேண்டும் என்று நினைக்கிறான்.

அந்த வலிமை ராமனுக்கு உள்ளது என்பதையும்  தசரதன் உறுதி செய்துகொள்கிறான். 

எப்படி?

"நலங்கொள் மைந்தனைத் தழுவினன் என்பதென் நளிநீர் 

நிலங்கள் தாங்குறு நிலையினை நிலையிட நினைந்தான் 

விலங்கல் அன்னதிண் தோளையும், மெய்த்திரு இருக்கும் 

அலங்கல் மார்பையும் தனதுதோள் மார்பு கொண்டு அளந்தான்' 

தசரதன் தன் மகன்  ராமனைத் தழுவினான். 

தழுவியது எதற்காக?

தன் தோளைக் கொண்டு ராமன் தோளை அளக்க!

தன் மார்பளவைக் கொண்டு ராமன் மார்பளவைக் கண்டுகொள்ள!

இப்படி ஆரத் தழுவும்போதே ராமனின் பரந்த தோளையும் அகன்ற மார்பையும் அளந்து அதில் திருப்தியுற்றவனாக அரச பதவியை ராமனிடம் ஒப்படைத்துவிட்டு தவம் செய்ய விரும்புகிறான். 

ஆங்கிலத்தில் இந்தத் தலைமைப் பண்பைக் குறிக்க broad sholders என்று சொல்லுவார்கள்.

He has broad sholders என்றால் அவனுக்கு அரசாங்கத்தை நடத்தும் திறமை இருக்கிறது. கடினமான பொறுப்புகளைத் திறம்படச் செய்யும் சாதுர்யம் இருக்கிறது என்று பொருள்.

கிருபானந்த வாரியார் ஒரு முறை இந்தப் பாட்டுக்கு இப்படி விளக்கம் சொன்னார்.

"தன் மகன் ராமன் சரியானபடி தான் இருக்கிறான் என்பதை அவனை மார்போடு அணைத்து தசரதன் உறுதிப்படுத்திக் கொண்டான்.

இன்றும் கூட தந்தையர்கள் அப்படிச் செய்வது உண்டு.  தங்கள்  மகனை ஆரத் தழுவிக் கொள்வதுண்டு. 

அப்படித் தழுவிக் கொள்ளும் போது மகன்  சட்டைப் பையில் அக்னி காரியம் செய்கின்ற பெட்டி ஏதாவது இருந்தால் அது தந்தையின் மார்பில் உறுத்தும்.

அப்படி ஒன்றும் உறுத்தவில்லை என்றால் 'தன் மகன் நலங்கொள் மைந்தன்' என்று தந்தை அறிந்து கொள்ளலாம்" 

என்று விளக்கம் சொன்னார் வாரியார்.

அக்கினி காரியம் செய்கின்ற பெட்டி என்று வாரியார் சொன்னது சிகரெட் பிடிக்கப் பயன்படுத்தும் தீப்பெட்டி எனப் புரிந்து கொள்ள பொழிப்புரை எல்லாம் தேவையா என்ன?

இப்படி, 

பரந்த தோளும் அகன்ற மார்பும் தான் நம் நாட்டில் ஆட்சித் தலைவர்களுக்கு இலக்கணம். அது சரி தான்.

ஆனால், 

அமெரிக்காவில்  ஜனாதிபதிகளின் மார்பளவுகளை யாரும் கவனிப்பதில்லை. லிங்கன் போன்ற ஒல்லியான உடல்வாகு கொண்ட ஜனாதிபதிகள்  நிறையப் பேர் இருந்துள்ளனர். 

அதிக உயரம் வளர்ந்தவர்கள் தான் ஜனாதிபதி ஆக வேண்டும் என்று அமெரிக்க மக்கள்  தனியான ஒரு  இலக்கணம் வைத்திருப்பார்கள் போல. 

அமெரிக்க ஜனாதிபதிகள் பெரும்பாலும் ஆறடிக்கும் குறையாத உயரம் உடையவர்கள். 

ஆபிரகாம் லிங்கன் அநியாயத்துக்கு உயரம். 6 அடி 4 அங்குலம் உயரமுடையவர். அதாவது 193 cm.

டொனால்ட்  ட்ரம்ப் மட்டும் என்னவாம். 6 அடி 3 அங்குலம் உயரமுடையவர். அதாவது 190 cm.

பில் கிளின்டன் 6 அடி 2.5 அங்குலம் உயரமுடையவர். அதாவது 189cm.

பராக் ஒபாமா  6 அடி 1.5 அங்குலம் உயரமுடையவர். அதாவது 187 cm.

ஜான் கென்னடி 6 அடி 1 அங்குலம் உயரமுடையவர். அதாவது 185 cm.

ரொனால்ட் ரீகன் 6 அடி 1 அங்குலம் உயரமுடையவர். அதாவது 185cm.

ஜார்ஜ் புஷ்  6 அடி 2 அங்குலம் உயரமுடையவர். அதாவது 188 cm.

ஜார்ஜ் வாஷிங்டன்  6 அடி 1.5 அங்குலம் உயரமுடையவர். அதாவது 187 cm.

"ஓங்கி உலகளந்த உத்தமன்" என்பது ஆண்டாள் வாக்கு.