கசடதபற மட்டும்

 

வல்லின எழுத்துகளான கசடதபற எழுத்துக்களை மட்டும் பயன்படுத்தி காளமேகப்புலவர் எழுதிய பாடல் இது.

துடித்துத் தடித்துத் துடுப்பெடுத்த கோடற்

றொடுத்த தொடைகடுக்கை பொற்போற் பொடித்துத்

தொடைபடைத்த தோடுடித்த தோகைகூத் தாடக்

கடிபடைத்துக் காட்டித்துக் காடு.

சீர் பிரித்த பின்:

துடித்துத் தடித்துத் துடுப்பு எடுத்த கோடல்

தொடுத்த தொடை கடுக்கை பொன்போல் பொடித்துத்

தொடை படைத்த தோள் துடித்த தோகை கூத்தாடக்

கடி படைத்துக் காட்டித்துக் காடு.

சொற்பொருள்:

கோடல் -காந்தள் மலர்

கடுக்கை -கொன்றை

தோகை - மயில்

கடி - வாசனை

பாடலின் பொருள்: 

இது கார்காலம் குறித்த  பாடல்.

காந்தள் மலர்கள் முகிழ்த்து ஒளிகொண்டு அரும்புகளை எடுத்தன; 

கொன்றைகள் பொன்போல் ஒளிரும் மாலைகளைத் தொங்கவிட்டன; 

வளையல் அணிந்த மகளிர் தோள்கள் துடித்தன; 

மயில்கள் கூத்தாடின. 

இவ்வாறு காடு புதுமணம் படைத்துக் காட்சி தந்தது.

க், ச், ட், த், ப், ற் என்பனவாகிய வல்லின ஒற்றுகள் தொடர்ந்து செறிவாக இடம் பெறுமாறு செய்யுள் அமைதல் செறிவு வகையாகும்.