பிப்ரவரி 11

 

பிப்ரவரி 11, 1799 

ஆக்சிஜன் இல்லாமலேயே சில நுண்ணுயிரிகள் (Anerobiosis) உயிர் வாழ முடியும் என்பதை முதன்முதலாக மெய்ப்பித்துக் காட்டிய இத்தாலியைச் சேர்ந்த உயிரியல் விஞ்ஞானி லாசரோ ஸ்பால்லான்ஸானி இன்று காலமானார்.

பிப்ரவரி 11,1802

தென்தமிழ்நாட்டில் ஆங்கிலேய ஆட்சிக்கு எதிராகப் புரட்சி செய்த தலைவர்களில் தூக்குத்தண்டனை விதிக்கப்பட்டவர்களைத் தவிர மற்ற முக்கிய தலைவர்கள் 73 பேர் தூத்துக்குடியிலிருந்து அட்மிரல் நெல்சன் என்னும் கப்பல் மூலமாக பினாங்கிற்கும் பிரின்ஸ் ஆப் வேல்ஸ் தீவுக்கு இன்று நிரந்தரமாக நாடு கடத்தப்பட்டனர்.

15 வயதே நிரம்பிய மருது பாண்டியர் மகன் துரைச்சாமி,

ராமநாதபுரம் ஜெகநாத ஐயர்,

பாஞ்சாலங்குறிச்சி தளவாய் குமாரசாமி நாயக்கர்,

தளவாய் பிள்ளை,

தூத்துக்குடியில் புரட்சிக்கு தலைமை தாங்கிய பெத்தநாயக்கர்,

திண்டுக்கல் அழகு சொக்கு,

நாங்குநேரி இருளப்பதேவர்,

கொம்பாடி பாண்டிய நாயக்கர் முதலியோர் இதில் அடங்குவர்.

பிப்ரவரி 11,1847 

தாமஸ் ஆல்வா எடிசன் பிறந்த நாள். 

1093 கண்டுபிடிப்புகளின் காப்புரிமைகளைப் பதிவு செய்த புகழ்பெற்ற அமெரிக்க விஞ்ஞானியாக விளங்கியவர்  எடிசன்.

பிப்ரவரி 11,1908

ஜி.யு.போப் மறைந்த நாள். 

பிப்ரவரி 11,1914 

தென் ஆப்பிரிக்காவில் காந்தியடிகள் நடத்திய போராட்டத்தில் கலந்து கொண்டு சிறைசென்ற தில்லையாடி வள்ளியம்மை மாரிட்ஸ் பர்க் சிறையிலிருந்து இன்று விடுதலையானார்.

பிப்ரவரி 11,1917

அமெரிக்க எழுத்தாளர்  சிட்னி ஷெல்டன் (Sidney Sheldon)  பிறந்த நாள். 

இவர் திரைப் படங்களுக்கும் தொலைக்காட்சித் தொடர்களுக்கும் திரைக்கதை, வசனம் எழுதியதன் மூலம் பிரபலமானவர். 

தனது 50வது வயதைக் கடந்த  பின்னர் நாவல்கள்  எழுதினார். அந்த நாவல்கள் எண்ணிக்கையில்  ஒரு சில தான் என்றாலும் ஒவ்வொரு நாவலும் உலக அளவில் பேசப்பட்டது. 

மாஸ்டர் ஆப் த கேம், ரேஜ் ஆப் ஏஞ்சல்ஸ், தி அதர் சைட் ஆஃப் த மிட் நைட் எல்லாம் உலகம் பூராவும் வரவேற்பைப் பெற்ற இவருடைய நாவல்கள். 

பிப்ரவரி 11,1968

தற்போதைய பாரதிய ஜனதா கட்சியின் முக்கியத் தலைவர்களுள் ஒருவராக இருந்த  பண்டிட் தீனதயாள் உபாத்தியாயா மறைந்த தினம்.  இந்தியத் தத்துவத்தில் தலைசிறந்த அறிஞர், பொருளாதார வல்லுநர், சமுகவியலாளர், வரலாற்று ஆசிரியர், இதழாளர் மற்றும் அரசியல்தலைவர்  போன்ற பன்முகத் தன்மை கொண்ட சிந்தனையாளர் இவர். பாரதிய ஜன சங்கம் கட்சித் தலைவர்களில் முதன்மையானவர் எனக் குறிப்பிடப்படுபவர் . 

பிப்ரவரி 11,1974 

பிரபலமான திரைப்படப் பின்னணிப் பாடகர்  கண்டசாலா மறைந்த தினம்.  

அவருடைய முழுப் பெயர் கண்டசாலா வெங்கடேஸ்வர ராவ் .

தெலுங்கு, தமிழ், கன்னடம், மலையாளம், துளு மற்றும் இந்தி மொழி திரைப்படங்களில் பல பாடல்களைப் பாடியுள்ளார். சில திரைப்படங்களுக்கு இசையமைத்திருக்கிறார். 'கல்யாண சமையல் சாதம் காய் கறிகளும் பிரமாதம்' என்ற புகழ் பெற்ற பாடல் இவர் இசையமைப்பில் வந்தது தான்.

'முத்துக்கு முத்தாக

சொத்துக்கு சொத்தாக

அண்ணன் தம்பி பிறந்து வந்தோம்

கண்ணுக்கு கண்ணாக

அன்பாலே இணைந்து வந்தோம்

ஒண்ணுக்குள் ஒண்ணாக'

‘ஆஹா இன்ப நிலாவினிலே

ஓஹோ ஜெகமே ஆடிடுதே

ஆடிடுதே...விளையாடிடுதே’  

போன்ற பாடல்கள்  காற்றில் வரும்போதெல்லாம்  அந்தக்குரலுக்குச் சொந்தக்காரரான கண்டசாலாவின் நினைவும் கூடவே வரும். 

1942-ல் ‘வெள்ளையனே வெளியேறு’ போராட்டத்தில் கலந்துகொண்டு ஒன்றரை ஆண்டுகள் சிறையில் இருந்தார். 

திருமலை திருப்பதி கோவிலின் ஆஸ்தான பாடகராக இருந்தவர் இவர். 

அவரது நினைவைப் போற்றும் வகையில் 2003-ல் தபால்தலை வெளியிடப்பட்டது.

பிப்ரவரி 11,1977

இந்தியாவின் முன்னாள் குடியரசுத் தலைவராக  இருந்த பக்ருதின் அலி அகமது மறைந்த நாள்.  1974 முதல் 1977 வரை  இவர் குடியரசுத் தலைவராக இருந்தார். 

பிப்ரவரி 11,1979 

அந்தமான் சிறை தேசிய சின்னமாக்கப்பட்டது.

பிப்ரவரி 11,1990

 27 ஆண்டுகள் சிறையில் இருந்த தென்னாப்பிரிக்க தேசிய காங்கிரஸ் தலைவர் நெல்சன் மண்டேலா விடுதலை செய்யப்பட்டார்.