ஆகஸ்ட் 26

 

ஆகஸ்ட் 26, 1883

திரு.வி.க. பிறந்த நாள்.  

காஞ்சிபுரம் மாவட்டத்தில் துள்ளம் என்னும் சிற்றூரில் விருத்தாசல முதலியார் - சின்னம்மா தம்பதிகளுக்கு ஆறாவது மகனாக இன்று  திரு.வி.க. பிறந்தார்.

பெரிய புராணத்துக்கு குறிப்புரையும் வசனமும் எழுதியவர் அவர். யாழ்ப்பாணம் கதிரைவேற்பிள்ளை மீது கொண்டிருந்த பற்றால்,  கதிரைவேற்பிள்ளை சரிதம் என்ற நூலை எழுதினார். 

பட்டினத்துப் பிள்ளையார் பாடல் திரட்டு, தேச பக்தாமிர்தம், மனித வாழ்க்கையும் காந்தியடிகளும், நாயன்மார் திறம், தமிழ்நாடும் நம்மாழ்வாரும், முருகன் அல்லது அழகு, திருக்குறள் விரிவுரை, உள்ளொளி உள்ளிட்ட ஏராளமான படைப்புகளை வழங்கியவர். 

சிறந்த மேடைப் பேச்சாளரான திரு.வி.க.  தமிழ்த் தென்றல் என்று அழைக்கப்பட்டார்.

ஆசிரியராக, அரசியல்வாதியாக, இலக்கிய ஆர்வலராக, மேடைப் பேச்சாளராக வாழ்ந்தவர் இவர்.  

ஆகஸ்ட் 26, 1910

அல்பேனியா நாட்டைச் சேர்ந்த  ஆக்னஸ் கோன்ஜா போஜாஜியூ என்ற ரோமன் கத்தோலிக்கப் பெண்ணாக இந்தியாவில் நுழைந்து கல்கத்தாவில் ஆதரவற்றோருக்கான இல்லம் அமைத்த தெரசா அம்மையார் பிறந்த நாள் இன்று. 

செப்டம்பர் மாதம் 5  ஆம் தேதி மறைந்த அவருக்கு, அவரது இறப்புக்குப் பிறகு வாடிகன் கத்தோலிக்க சபை  புனிதர் பட்டம் வழங்கியது.

ஆகஸ்ட் 26, 1969

திரைப்படத் துறையில் பல சாதனைகள் புரிந்தவரும் வார இதழ் வெளியீட்டில் முடிசூடா மன்னராக விளங்கியவருமான ஆனந்த விகடன் ஆசிரியர் எஸ்.எஸ்.வாசன் இன்று காலமானார்.

ஆகஸ்ட் 26, 1992

தென் கொரியாவில் உள்ள  சியோல் ஒலிம்பிக் ஸ்டேடியத்தில் ஒரே சமயத்தில் இன்று 20,000 ஜோடிகளுக்கு திருமணம் நடந்தது. உலகிலேயே மிகப்பெரிய அளவில் நடந்த கூட்டுத் திருமண நிகழ்ச்சி இது.