இதெல்லாம் ஆசிரியப்பாவா?

இருப்பானிடங் கொடுவெனக் கொடுத்தனன் இரண்டினில்

ஒருபேனா இனியொரு தடையில்லை தொடர்ந்தெழுத 

கருப்பில் எழுதா தேயென் றார்

இருக்கும் இதுவொன் றும்போச் சே.

இது பாவாகுமா?

நிச்சயமாக. 

இது ஆசிரியப்பா தான்.

முதலில் அசை , தளை என்ற சடங்குகளை முடித்து விட்டு அதன் பின் விதிகளுக்கு வருவோம்.

அசை:

இருப்/பா/னிடங் -புளிமாங்கனி

கொடு/வெனக்-கருவிளம்

கொடுத்/தனன்-கருவிளம்

இரண்/டினில்-கருவிளம்

ஒரு/பே/னா-புளிமாங்காய்

இனி/யொரு-கருவிளம்

தடை/யில்/லை-புளிமாங்காய்

தொடர்ந்/தெழு/த-கருவிளங்காய்

கருப்/பில்-புளிமா

எழு/தா-புளிமா

தே/யென்-தேமா

றார்-மா

இருக்/கும்-புளிமா 

இது/வொன்-புளிமா 

றும்/போச்-தேமா

சே-மா

தளை:

இருப்/பா/னிடங் > கொடு/ வெனக் : ஒன்றிய வஞ்சித்தளை

கொடு/ வெனக்>கொடுத்/தனன்: நிரையொன்றிய ஆசிரியத்தளை

கொடுத்/தனன்>இரண்/டினில்: நிரையொன்றிய ஆசிரியத்தளை

இரண்/டினில்>ஒரு/பே/னா: நிரையொன்றிய ஆசிரியத்தளை

ஒரு/பே/னா> இனி/யொரு: கலித்தளை

இனி/யொரு>தடை/யில்/லை: நிரையொன்றிய ஆசிரியத்தளை 

தடை/யில்/லை>தொடர்ந்/தெழு/த: கலித்தளை

தொடர்ந்/தெழு/த>கருப்/பில்: கலித்தளை

கருப்/பில் >எழு/தா/தே: இயற்சீர் வெண்டளை

எழு/தா/தே >யென்/றார்: நேரொன்றிய ஆசிரியத்தளை

யென்/றார்>இருக்/கும்: இயற்சீர் வெண்டளை

இருக்/கும்>இது/வொன்: இயற்சீர் வெண்டளை

இது/வொன்> றும் /போச் : நேரொன்றிய ஆசிரியத்தளை

றும் /போச் >சே: நேரொன்றிய ஆசிரியத்தளை

தளைகளின் எண்ணிக்கை:

வஞ்சித்தளை-1

ஆசிரியத்தளை -8

கலித்தளை-3

வெண்டளை-3

சரி , இப்போது முக்கியமான கட்டத்துக்கு வந்து விட்டோம். 

ஆசிரியப்பா என்றால் என்ன விதிகள்?

1. குறைந்த பட்சம் மூன்றடிகள் பெற்றிருத்தல் வேண்டும்.

நம்மிடம் நான்கு அடிகள் உள்ளன.

2. இயற்சீர்கள் மிகுந்து வருதல் வேண்டும்.

பாதிக்கும் மேல் இயற்சீர்கள் தான் வருகின்றன. (தேமா, புளிமா, கூவிளம், கருவிளம் ஆகிய நான்கும் தான் இயற்சீர்கள்)

 3.ஆசிரியத்தளை மிகுந்து வருதல் வேண்டும்.

15 தளைகளுள் 8 ஆசிரியத்தளைகள் என்பதால் இதுவும் சரியாக இருக்கிறது.

4. ஈற்றடியின் ஈற்றசை ஏ, ஓ, ஈ, ஆய், ஐ அல்லது என் என்று முடிதல் வேண்டும்.

நம்முடைய பா ( பா தான்) 'சே' என முடிகிறது. அதாவது ஏ ஓசை. ஆக இதுவும் சரி.

5.கருவிளங்கனி, கூவிளங்கனி ஆகிய வாய்பாடுகள் வருதல் கூடாது.

அப்படி எதுவும் வரவில்லை.

6.அளவடியை விட அதிகமான சீர்கள் கொண்ட அடிகள் வருதல் கூடாது.

அளவடி என்பது 4 சீர்கள் கொண்டது. நம் எல்லா அடிகளும் அளவடிகள் தான்.

7.முதலடியும் ஈற்றடியும் அளவடியை விட குறைந்து வருதல் கூடாது. இடையே அடிகள் குறைந்து வரலாம். அப்படி, இடையே அடிகள் குறைந்தால் சிந்தடி மற்றும் குறளடிகள் மட்டும் வருதல் வேண்டும்.

நம் எல்லா அடிகளும் அளவடிகள் தான்.

ஆக, மேற்கண்ட ஏழு நிலைகளையும் வெற்றிகரமாகத் தாண்டிவிட்டதால் இது ஆசிரியப்பா தான். 

அது சரி இந்தப் பாட்டு என்ன கருத்தைச் சொல்லவருகிறது என்றெல்லாம் கேட்கக் கூடாது.

அதெல்லாம் விதிகளில் வராது.